Gen 29 | WSK | STEP | Jacob aolak iluwam namakaso. Ale nama koma worem bausa mu ko wonong bo te aratam.

Genesis 29

Jacob Laban ko sor te nama aratam

1 Jacob aolak iluwam namakaso. Ale nama koma worem bausa mu ko wonong bo te aratam. 2 Ale loaga guruguwa sipsip motam ilagala suwan yu mutim duap te ani geraga se animan mu nungarkam. Se yu mutim kuring awete mu manga biya te baguman. 3 Se tom sipsip suen la tai bolala awumon, mu nunga bitua kari yu mutim kagarmon ale yu nungarmonko. Se sipsip yu namon nama terong mamon, asele nunga bitua kari manga mu yu kuring te aking bagumonko.

4 Se Jacob nunga isuam, “Aga saki alo,” mam, “nina arika ko ya?”

Se nuna balman, “Ana Haran ko.”

5 Se aking nunga isuam, “Nina Nahor ko numas Laban ko ikisan e?”

Se nuna balman, “Ana ko ikisan.”

6 Se Jacob aking nunga isuam, “Laban yawarakala bagoso e?”

Se nuna balman, “Nu yawarakala bagoso. Arikko, ko nanawus Rachel noko sipsip arungak taiwoso.”

7 Se Jacob balam, “Woremkalal biya. Aitak sipsip kar ningi awura ko tom mena. Yu la nungaral se namon se arungak peleral se sirsir namonko.”

8 Bare sipsip bitua kari balman, “Mena. Ana suwuta me betenakko. Sipsip suen la tai bolala awumon umutang te asele ana yu mutim kuring kagornak ale yu nungarnak se namonko.”

9 Se Jacob sipsip bitua kari arungu munakawaram se Rachel sipsip giam arungak tairam, mu awuk, nu sipsip nunga bitua ko ura ikia tala se arungu tairam. 10 Se Jacob nu arigam, ale ko nue Laban ko sipsip Rachel giam arungu taiwaram mu arigam, ale nu yu mutim te namaram ale manga mu gurugu beteram ale sipsip yu nungarukaso. 11 Asele nu Rachel kol misikiram ale ilak niaram, 12 ale maonam, “Ani nika ba ko koras Rebecca ko namar ani.” Se Rachel nagu nagu namaram ko nuet maonam.

13 Se Laban ko nugar Jacob tairam wore ko den ikiam, ale naguram kote namaram. Ale iluwam kol misikiram ale ilak ko kawam te namaram. Se Jacob nu mel suen biya nu kumik te aratam mu ko Laban maonam. 14 Se Laban balam, “Se nunguningta,” mam, “ni analak gue suwanta.”

Jacob Leah se Rachel nunga giokko ura tokaso

Se Jacob Laban ilak sige suwanta bagakaso se 15 Laban Jacob maonam, “Ni aninga aigar nunguning se aninga angamang ni am ipi ura toko me kaeso. Bare nika koma anapeya ko kuesam mu ago aga manaru se ikiekko.”

16 Se Laban ko kuriang imet ilagala, biya mu Leah, gotek mu Rachel. 17 Leah ko motam ko ariga yawara nunguning, bare Rachel mu ko koma motam kumik mu ko ariga am yawarakala nunguningkiri. 18 Jacob Rachel ko ninguru kuakaso ale Laban maonam, “Ani nika nanawus gotek Rachel taikko ani yar 7 nikate ura taikko,” mam.

19 Se Laban balam, “Mu nunguningta se ani kisekko, kari bo kilimik tuekko angamang me aniso. Buta se ni ani agarak bagerko.” 20 Se Jacob yar 7 Rachel taukko ura tam. Ale nu ikiam yar 7 mu mel yam ma balam, mu awuk, nu Rachel ninguru gomang tuikaso.

21 Asele Jacob Laban maonam, “Tom menaram,” mam. “Ka nanawus aisu se ilak naikko.”

22 Se Laban na inang biya beteram ale kariimet nunga auram se nukote tai gilingiman. 23 Bare turom mu te Laban Leah gurugam ale Rachel kuwim te beteram se Jacob kote namaram se ilak aniram. 24 Laban ko ura saonga imet bo Leah tuam, ko nup Zilpah.

25 Se turomola Jacob Leah koma arigam, ale namaram Laban maonam, “Ni anape ko munan ewere ani angimik te beterem? Ani Rachel taikko ura kowar taem. Bare ni awuk se aninga kulem?”

26 Se Laban balam, “Anananga munan iwita,” mam, “kuriang laun mu kari tauk, se ko uria mu udagi. 27 Ni am kimi bita sager na yu imi menaruk asele Rachel ago kisekko. Bare ni bo agotala yar 7 ko ura toko.”

28 Se Jacob butata beteram, se ubou nuna na yu te beteman mu menaram asele Laban ko kuriang imet gotek mu Jacob tuam se ko nuwus ko aram. 29 Laban ura saonga imet bo Rachel tuam, ko nup Bilhah. 30 Se Jacob Rachel ilak anikaso, ale ninguru ko kuakaso, bare Leah ninguru me ko kuakaso. Ale Jacob udagi yar 7 tala Laban kote ura tam.

Jacob ko kuriang alo

31 Kari Biya Jacob ko ikia arigam, wore Jacob Leah ko tawun biya me kuakaso. Se Kari Biya Leah saongam se tuagu aratam. Bare Rachel mu kuriang me ilukaso. 32 Leah tuagu aratam se kuriang kari iluwam. Ale balam, “Kari Biya aninga angamang ikup arigam ale aga saongam. Se aitak aga agari aga kuerukko,” mam. Ale kuriang nup Reuben i mam. ^{▼▼Gen 29:32 Hebrew den te nup Reuben mu ko nunguning mu “arikko, kuriang kari”, se ko nirung mu den imi ko nirung ko pingita: “aninga angamang ikup ikiam”.}

33 Aking udagi tala Leah tuagu aratam se aking kuriang kari tala iluwam. Ale balam, “Kari Biya kuriang kari bo agotala aisam, mu awuk, nu Jacob me aninga kueso se ikiam ale.” Ale kuriang nup Simeon beteram. ^{▼▼Gen 29:33 Nup Simeon mu ko nunguning mu “ikiso”.}

34 Se Leah akingtala tuagu aratam ale kuriang kari tala iluwam. Ale balam, “Aitak asele aninga agari ninguru aga kuerukko. Mu awuk, ani noko kuriang kari ilagala suwan iluwem se.” Ale kuriang nup Levi beteram. ^{▼▼Gen 29:34 Nup Levi mu ko nunguning mu “atumukira”.}

35 Se Leah akingtala tuagu aratam ale kuriang kari tala iluwam. Ale balam, “Tom imitang ani Kaem nup patawirikko.” Ale kuriang nup beteram Judah mam. ^{▼▼Gen 29:35 Nup Judah mu ko nunguning mu “nup patowara”.} Se ko udagi mu Leah kuriang bo me ilukaso.